Исломнинг учинчи зиёратгоҳи, босиб олинган Қуддусдаги Ал-Ақсо масжидида 200 минг мусулмон Қадр кечасида намоз ўқиш учун йиғилди.



Қуддус исломий вақфлар идораси маълумотларига кўра, бу йил Қадр кечаси Рамазон ойининг 27-куни, яъни 5 апрелдан 6 апрелга ўтар кечасига тўғри келди.

Бу мусулмон тақвимидаги муборак кечалардан бири, шунинг учун уни ибодатлар билан нишонлаш одат тусига киради. Мусулмонлар бу муборак кечада ўқиладиган ибодат минг ойлик намозга тенг, деб ҳисоблашади.

Минглаб фаластинлик оилалар тўғридан-тўғри ерга дастурхон ёйиб ифторлик қилишди. Кўпчилик Ислом зиёратгоҳи ҳовлисида чодирлар ўрнатган.

Қадр кечаси муносабати билан бутун мамлакатдан Шарқий Қуддусга Исроилнинг минглаб Фаластинлик фуқароларини олиб кетаётган юзлаб автобуслар етиб келди.

Исроил ҳарбийлари шаҳарда қаттиқ хавфсизлик чораларини кўрган ва ҳеч қандай ҳодиса қайд этилмаган.

Исроил полицияси аввалроқ Рамазон ойининг охирги жума куни босиб олинган Шарқий Қуддусга 3600 политсиячи юборилиши ҳақида хабар берган эди.

Шарқий Қуддусга Ғарбий Соҳилдан чекланган миқдордаги фаластинликларга рухсат берилди

Айни пайтда Исроил томонидан қўйилган чекловлар ва тақиқлар туфайли босиб олинган Ғарбий Соҳилдан минглаб фаластинлик диндорлар Шарқий Қуддусдаги Ислом зиёратгоҳига кира олмадилар.

Бу йил Исроил ҳукумати Ғарбий Соҳилдан чекланган миқдордаги фаластинликларга масжидга киришга рухсат берди.

Ҳарбийлар босиб олинган ҳудуддаги фаластинликларга ўз машиналарида Қуддусга назорат пунктларидан ўтишларига рухсат бермайди, улар пиёда юришлари керак.

Бундан ташқари, Исроил блокададаги Ғазо секторидаги фаластинликларга Ал-Ақсо масжидини зиёрат қилиш учун рухсатнома бермайди.

Умуман олганда, жума кунлари 55 ёшдан ошган фаластинликлар ва Ғарбий Соҳилдан 50 ёшдан ошган фаластинликлар рухсатнома билан Қуддусга киришлари мумкин.

Шу билан бирга, улар шом намозидан олдин шаҳарни тарк этишлари керак. Шу муносабат билан Ғарбий Соҳилдан келган фаластинликлар Шарқий Қуддусда қолиб, Қадр кечасини Ал-Ақсо масжидида ўтказиш имконига эга эмас.