Абу Дужона Симок ибн Харша, кунялари Ибн Лузан (р.а.), саҳобийлардан.   Бадр, Уҳуд жангларида иштирок этганлар. Уҳуд куни Расулуллоҳ (с.а.в.) билан бирга собит қолганлар ҳамда ўша куни ўлимга ҳам байъат қилганлар. Расулуллоҳ (с.а.в.) Уҳуд куни қўлларига қилич олиб: «Буни мендан ким олади?» дедилар. Қавмдагилар олиб унга қарашаётган эди, у зот: «Буни ҳаққи билан ким олади?», дедилар. Қавм олишдан қўл тортди. Шунда Абу Дужона: «Мен уни ҳаққи билан оламан», деб у қилич билан мушрикларнинг бошини иккига ёра бошладилар. Ямома куни қатл этилганлар.