Имоми Ҳарамайн Абул Маъолий Абдулмалик ибн Абдуллоҳ Жувайний милодий 1028 йили Нишопур яқинидаги Жувайн мавзеида туғилган. Ашъарий каломининг етук намояндаси. Имом Абу Ҳомид Ғаззолийнинг устози. Калом, усулид-дин, фиқҳ илмларини яхши билган. Бирмунча вақт Макка ва Мадинада яшаб, Имоми Ҳарамайн унвонини олган. Нишопурга қайтиб, ўзига атаб қурилган Низомиййа мадрасасида умрининг охиригача дарс берган. Унинг калом илмига доир «Аш-Шомил» асари маълум. Милодий 1085 йили вафот этган.
