Луғатда «Сизга тинчлик ва омонлик тилайман» деган маънони билдиради. Мусулмонлар кишилар билан учрашганда ёки бирор жойга кирганда, кўча-кўйда, жамоат жойларида, хайрлашаётганда ана шу ибора билан саломлашадилар. Бу Қуръони карим амри (Нур, 61) ва Пайғамбар алайҳиссалом суннатлари билан жорий бўлган. Саломга жавоб тарзида «Ваалайкум ассалом», агар мукаммалроғи исталса «Ваалайкум ассалом ва роҳматуллоҳи ва барокатуҳ» деб алик олинади. Салом бериш суннат, алик олиш вожиб саналади. Салом таниш-нотанишга берилаверади. Кичиклар катталарга, озчилик кўпчиликка, уловдаги пиёдага, пиёда эса ўтирган кишига салом беради. Намозхонлар ҳам намоздан икки томонга салом бериш билан чиқишади.
