Луғатда «суффа кишилари, соҳиблари» деган маънода. Расулуллоҳ (с.а.в.) даврларида у зотнинг масжидлари олдидаги суффада ибодат ва Аллоҳнинг зикри ила машғул бўлиб, Аллоҳ ва Унинг Пайғамбари амрларини кутиб ўтирган кишиларга шундай ном берилган. Улар Маккадаги уй-жойлари, мол-мулкларини қолдириб, Мадинага ҳижрат қилиб келган бошпанасиз, мискин муҳожирлар бўлишган. Уларнинг адади тўрт юз нафарча эди. Расули акрам ва ўзига тўқроқ саҳобийлар Асҳоби суффанинг ҳолидан хабардор бўлиб туришган.
