Қирғизистон, Қозоғистон, Ўзбекистонда яшаб келаётган хитойлик мусулмонларга берилган ном. Мўғул ҳукмдори Қубилай Хон замонида (1260-1294) буддий татар ва мўғуллардан бир қисмининг мусулмонликни қабул этиши муносабати билан уларга «эски динидан дўнган (қайтган), ихтиво этган» маъносида «дўнган» деб ном берилган. Бу калима хитойчада «тунг-қан», рус ва араб манбаларида «тунган», «дунган» шаклида тилга олинади. Шарқий Туркистон турклари (уйғурлар) бутун Хитой мусулмонларини шу ном билан атасалар-да, булар бугун кўпроқ «нуйтса» ёки «ху-ху» оти билан эсланади. Аммо Хитой мусулмонлари «дўнган» номини ўзлари учун ҳақорат деб билишади. Ҳозир Марказий Осиё ўлкаларида жами етмиш мингга яқин дўнган истиқомат қилади. Эътиқодда сунний мусулмон бўлган дўнганлар кўпроқ ҳанафий мазҳабига мансубдирлар.