Жалолиддин Муҳаммад ибн Асад ас-Сиддиқий ал-Даввоний, Хуросоннинг таниқли олимларидан. Милодий 1427 йилда Эроннинг Ҳазарун вилоятидаги Давон қишлоғида туғилган. Шероз мадрасасида таҳсил олган. Кейин Шероз қозиси, мадраса мударриси бўлган. Замонасининг етук фақиҳи эди. Абдураҳмон Жомий, Али Қушчи ва бошқа мутафаккирлар билан мулоқотда бўлган. Унинг «Ахлоқи Жалолий», «Рисола дар илмун-нафс», «Рисолаи фи тажвиҳ ул-ташбиҳ», «Тариқати тарбият ул-авлод» каби ўнлаб асарлари бор. Милодий 1502 йили вафот этган ва қишлоғига дафн қилинган.
