Абул Маъолий Абдулмалик ибн Абдуллоҳ, ашъарий калом илмининг кўзга кўринган вакилларидан. Милодий 1028 йили Нишопур яқинида туғилган. Отаси ва устозларидан фиқҳ, усулид-дин, калом илмларини чуқур ўрганди. Отаси вафотидан кейин унинг ўрнига шофеъий фиқҳидан дарс берди. Салжуқийлар таъқибидан қочиб, Макка ва Мадинада яшаган, шунинг учун Имоми Ҳарамайн унвонини олган. Кейин Нишопурга қайтиб, ўзига атаб очилган Низомийя мадрасасида дарс берди. «Калом аш-шомил», «Ал-иршод», «Ал-ақида ан-Низомийя» каби асарлари бор. Милодий 1085 йили вафот этган.