Зайд ибн Ҳориса (р.а.) Расулуллоҳнинг (с.а.в.) озод қилган қуллари ва тутинган ўғиллари эдилар. Ёшликдан Пайғамбаримиз оилаларида улғайдилар. Маккалик илк мусулмонларнинг Ҳазрати Хадичадан кейинги учинчиси бўлганлар. Қуръони каримда (Аҳзоб, 37) исми зикр қилинган бирдан-бир саҳобий. Зайднинг оталари Ҳориса Қадоа қабиласидан эди. Зайд ёшликларида оналари билан сафарда асир тушиб қолиб, Маккадаги Укоз бозорида Ҳазрати Хадичага атаб сотиб олинган. Кейинчалик у  Расулуллоҳга ҳадя этилган, у зот эса Зайдни қулликдан озод қилганлар. Зайд кейин топилган оталари билан кетишни истамаганларида Пайғамбаримиз у кишини ўғиллика олиб, меросхўр қилдилар. Расули акрамдан битта ҳадис ривоят этганлар. Бадрдан Мутагача барча ғазотларда Расулуллоҳ билан бирга бўлганлар. Пайғамбаримиз атрофларга юборадиган еттита сариййа (орасида ўзлари бўлмаган қўшинлар) га бу зотни амир қилиб тайинлаганлар. Ҳижрий 8 (милодий 629) йилдаги Мута жангида шаҳид бўлганлар.