Луғатда «икки шохли» деган маънони билдиради. Қуръони каримнинг Каҳф сурасида зикри келган мўмин банданинг номи. Баъзи тадқиқотчилар чалкаштирганидай у Македониялик Искандар (Александр Македонский) эмас, чунки у мўмин бўлмаган. Қуръонда қиссаси келган ва қадимда яшаб ўтган буюк шоҳ Зулқарнайнга Аллоҳ таоло Ерда салтанат берган ва барча нарсага йўл-имконият ато этган. Сафари давомида учратган бир қавмга Ер юзида бузғунчилик қилиб юрган Яъжуж ва Маъжуж қавмидан ҳимояланиш учун бир девор-тўғон қуриб берган. Ибн Жарир Табарийнинг «Жомеъ ул-баён» тафсирида келтирилишича, Зулқарнайн Миср аҳлидан чиққан киши бўлиб, унинг исми Марзубо ибн Мардуба ал-Юноний + Юнон ибн Ёфас ибн Нуҳ авлодидандир.