Ўзбекистон Мусулмонлари идорасининг ҳафталик диний-ижтимоий газетаси номи. 1990 йил март ойидан чиқа бошлаган. Дастлаб 40 минг, кейинчалик 130 минг, ҳозирда эса 10 минг нусхада босиляпти. «Ислом асослари», «Имом минбари», «Исломий ахлоқ-одоб», «Динимизга ёт оқимлар» каби рукнлар остида идора фатволари, Олий ҳайъат ва Уламолар кенгаши ҳужжатлари, Ислом арконлари ва тарихига доир мақола ва хабарлар эълон қилинади. Газетага турли йилларда Муҳаммад Шариф Жуман, Баҳодир Муртазо, Отақул Мавлонқул, Абдураззоқ Юнус, Исомиддин Олим Шайх муҳаррир бўлишган.