Лут алайҳиссалом Иброҳим алайҳиссалом укасининг ўғли бўлган, у киши билан бирга Бобилдан ҳижрат қилган. Шом атрофидаги Садўм деган ерга келиб ўрнашган. Бу ердаги қавм Аллоҳ ҳаром қилган иш + баччабозлик билан шуғулланар эди. Лут алайҳиссалом уларни Аллоҳнинг азобидан қўрқитиб, кечаю кундуз насиҳат қилди. Аммо қавми бу жирканч одатидан воз кечмади, ҳатто йигитлар қиёфасида келган фаришталарга ҳам ташланмоқчи бўлди. Шунда Аллоҳ таоло уларга қаттиқ жазосини юборди: устларига тош ёғдирди, қаттиқ зилзила билан масканларини остин-устун қилиб ташлади. Дунё харитасидаги ҳозирги Лут кўли (Ўлик денгиз) ўша қавм мамлакати ўрнида бўлган. Лут алайҳиссалом эса ўзига эргашганлар билан у ерни олдинроқ тарк этган эди. Қуръони каримда Лут алайҳиссалом ва унинг қавми ҳақида бир неча ояти карималар бор.
