Муҳаммаджон ҳожи Мулла Рустамхон ўғли, Ҳазрати Мавлавий, Домла Ҳиндистоний, Домла Ҳўқандий, Ҳожи Домулло номлари ила машҳур таниқли Ислом олими, муфассир, муҳаддис, фақиҳ, мутассаввиф. Ҳижрий 1310 (милодий 1892) йили Қўқонда туғилган, Қўқон, Самарқанд, Бухоро, Ҳиндистоннинг Ажмир шаҳарларида илм олган. Кейин Қўқон, Тошкент, Душанбеда имомлик қилган, дарс берган. Совет ҳукумати бир неча бор қамаб, сургун қилган. Умри ниҳоясида Тожикистон Фанлар академиясида таржимон бўлган. Милодий 1980 йили Душанбеда вафот этган.
