Арабчада «маёқ» дейилади. Истилоҳда масжид, мадрасалар ёнида уларга туташ ҳолда қуриладиган юксак иншоот «минора» деб аталади. Муаззинлар унга кўтарилиб намозга азон айтишади. Миноралар пойдевор, пилпоя (зина), қафаса ва муқарнас каби қисмлардан иборат бўлади. Маккадаги Масжидул Ҳаром, Мадинадаги Масжидун-Набавийя, Бухородаги Минораи Калон, Хивадаги Исломхўжа мадрасаси минораси, Анқарадаги Кўжатепа, Истанбулдаги Сулаймония, Марокашдаги Қутубия, Дамашқдаги Ал-Бадр ва бошқа миноралар Ислом оламида машҳур.
