Луғатда «ор, ҳаё, айб, аврат, ўринбосар» деган маъноларни англатади. Шариат истилоҳида эса эвазига ҳеч нарса олмай, савоб умидида бирор нарсани фойдаланиб туришга мулк қилиб бериш «орийат» дейилади. Бунда нарса эгаси бошқа кишига яхшилик қилиш мақсадида холис, эвазига бирор нарса талаб ёки умид қилмасдан, ўзига тегишли нарсани фойдаланишга беради. Уламолар бу амалнинг шаръан жоиз эканига Қуръони карим ва ҳадиси шарифлардан кўплаб далиллар келтиришган.
