Қуръони каримнинг ўттиз тўртинчи сураси номи, Маккада нозил бўлган, 54 оятдан иборат. Сура Еру осмонларнинг ёлғиз яратувчиси ва эгаси Аллоҳ таолога ҳамду сано билан бошланади. Сўнгра унда Аллоҳнинг барча сиру асрорлардан огоҳ экани, Қиёмат куни дунёдаги ҳар бир яхшилик ёки ёмонликнинг мукофот ёки жазосини беражаги, Ҳақ йўлдан адашган кимсалар учун азоблар борлиги ҳақида сўз боради. Сурада Довуд ва Сулаймон алайҳимуссалом қиссалари яна зикр қилинади. Унда Аллоҳ таоло ато этган неъматларга ношукрлик қилгани учун улардан маҳрум бўлган Сабаъ қабиласи ҳақида ҳам ҳикоя қилингани учун сура шу номни олган.