Абу Руқия Тамим ибн Авс ибн Хорижа ад-Дорий (р.а.), саҳобалардан. Исломга киргунча насроний бўлганлар. Ҳижратнинг тўққизинчи йили Ислом билан шарафланганлар. Фаластин аҳлининг обиди, Қуръонни кўп тиловат қилувчи, масжидга биринчи чироқ олиб кирган саҳобий эдилар. Расулуллоҳдан (с.а.в.) 18 та ҳадис ривоят қилганлар, булар Имом Бухорий ва Муслим «Саҳиҳ»ларига кирган. Мадинада истиқомат қилганлар, Ҳазрати Усмон ўлдирилганларидан кейин Шомга кўчиб кетганлар. Ҳижрий 37 йили Фаластинда вафот этганлар.
