Абу Али Фузайл ибн Иёз, машҳур тасаввуф шайхларидан, Мансур ибн Бишрат Марвазий ал-Маккийнинг набираси. Ҳижрий 105 (милодий 724) йилда Самарқандда туғилган. Ёшлигида қароқчи-ўғри бўлган. Бир воқеа сабаб бўлиб Аллоҳнинг каломидан қаттиқ таъсирланади ва гуноҳларига тавба қилади. Тавба қилувчиларнинг энг илғори, карам ва эҳсон соҳиби, жўмардлик ва ирфон эгаси, шайхларнинг улуғи бўлган. Маккаи мукаррамадаги Масжид ул-Ҳаромда илм ҳалқаси тузган, ишончли ҳадис ровийи бўлган. Имом Шофеъийнинг ундан таҳсил олганлари ривоят қилинади. Ҳижрий 187 (милодий 802) йилда Маккада вафот этган.
