Қуръони каримнинг етмиш бешинчи сураси номи, Маккада нозил қилинган, 40 оятдан иборат. Суранинг номидан маълум бўлганидек, унда сўз асосан қиёмат куни ва қайта тирилиш ҳақида боради. Сўнгра қиёмат кунининг аломатлари зикр қилинади ва у кун келгач, бирор инсон Аллоҳ таолонинг одил жазосидан қочгани жой тополмай қолиши ҳақида хабар берилади. Шунингдек, унда Пайғамбар алайҳиссаломга нозил бўлаётган ваҳийни қандай қабул қилиб олишлари лозимлигини таълим берадиган оятлар мавжуд.
