Абул Ҳусайн Аҳмад ибн Муҳаммад ибн Жаъфар ал-Қудурий ал-Бағдодий, Ироқ ҳанафий олимларининг етукларидан, машҳур фақиҳ, «асҳоб ут-таржиҳ»дан ҳисобланган олим. Ҳижрий 362 (милодий 972) йилда Бағдодда туғилган. Унинг «Ал-мухтасар» асари ҳанафий фиқҳининг шоҳ асарларидан саналади. Бу асар Алоуддин Самарқандийнинг «Туҳфат ул-фуқаҳо», Бурҳониддин Марғинонийнинг «Бидоя» ва «Ҳидоя» китобларига асос бўлган, унга ўттизга яқин олим шарҳ ва ҳошиялар ёзган.
