Луғатда «бир нарсанинг устидан сув оқизиш» маъносида берилган. Шаръий истилоҳда эса Аллоҳ таолога қурбат ниятида баданнинг ҳамма ерига сув оқизиб тозалашдир. Инсон шаръан тайин қилинган ҳолларда вужудидаги нопокликларни кетказиш учун ғусл қилиб тозаланиш шартдир. Ғусл вожиб бўлган одам ғусл қилмасдан намоз ўқиши, Қуръон ушлаши ёки тиловат қилиши, масжидга чиқиши ва бошқа ибодатларни адо этиши мумкин эмас. Ҳаж ва умра учун эҳромга кириш, жума ва ҳайит намозлари олдидан ғусл қилиш суннат амаллардан саналади.
