Ҳиндистон шимолидаги Уттар-Прадеш штатида ҳалол озиқ-овқат маҳсулотларини ишлаб чиқариш, сақлаш, тарқатиш ва сотишга тақиқ қўйилди, экспорт учун ишлаб чиқарилган маҳсулотлар бундан мустасно.
Ўта ўнг Ҳиндутва мафкурачилари бошчилигидаги штат ҳукумати кенг қамровли тақиқ 19 ноябр куни эълон қилинганидан кейин дарҳол кучга киришини айтди.
Қарор Бош вазир Йога Адитянатхнинг юқори лавозимли амалдорлар билан учрашувидан сўнг, расмий вакил "ҳалол" ёрлиғи "тарғибот" тарқатиш ва "диний туйғуларни" манипуляция қилиш учун ишлатилаётганини айтганидан бир неча соат ўтгач қабул қилинди.
Ушбу чорани асослаб, расмийлар баъзи «анти-миллий элементлар» ҳалол сертификатлашдан «адолатсиз молиявий фойда» олиш учун фойдаланишини ва «миллатни исломлаштириш» воситаси сифатида қўлланишини даъво қилишди.
Бундан ташқари, расмийлар ҳалол сертификатлаш мажбурий эмаслигини ва озиқ-овқат, дори-дармон ва косметика билан боғлиқ давлат қоидалари билан тан олинмаслигини даъво қилмоқда.
Баъзи ташкилотларни ҳақиқий бўлмаган ҳалол сертификатлари орқали товарларни сотиш учун диний туйғулардан фойдаланганликда айблаб, 17 ноябр куни Лакхнау комиссариатида полицияга ариза топширилди.
Хусусан, Halal India Private Limited Chennai, Jamiat Ulama-i-Hind Halal Trust Delhi, Halal Council of India Mumbai, Jamiat Ulama Maharashtra ва бошқа компаниялар муайян дин харидорларига ҳалол сертификатлар бериш орқали сотишни кўпайтириш учун диний туйғулардан фойдаланишда айбланди.
Айбланувчи ташкилотлар ҳалол сертификатлаш хизматларининг ихтиёрий хусусиятини таъкидлаб, айбловларни рад этишди.
"Бундай маҳсулотлардан фойдаланишни истамаганлар улардан фойдаланмасликлари мумкин", деди давлат стандартлари ва қоидаларига мувофиқ сертификатлаш хизматларини кўрсатадиган таниқли Jamiat Ulama-i-Hind Halal Trust ташкилоти.
Ҳиндистонда ҳалол сертификатлари ҳалолни сертификатлаш органлари (HCB) томонидан тақдим этилади. Ҳиндистонда энг машҳур HCB қаторига қуйидагилар киради: Halal India Private Limited, Halal Certification Services India Private Limited, Jamiat Ulama-E-Maharashtra — бу Jamiat Ulama-E-Hind давлат бўлинмаси, Jamiat Ulama-i-Hind Halal Trust.
Бироқ, Уттар-Прадеш ҳукумати маҳсулот ёрлиқларида «ҳалол сертификат» ҳақида ҳар қандай эслатма сохталаштириш эканлиги ва жиноий жавобгарликка тортилишини даъво қилмоқда. Душанба куни озиқ-овқат ва фармацевтика хавфсизлиги бошқармаси (FSDA) Уттар-Прадешдаги Sahara Mall савдо марказига бостириб кириб, совуқ ичимликлар, гўшт ва қуруқ мевалар каби нарсаларни текширди.
Уттар-Прадешнинг Бош вазири, ҳинд роҳиби Йога Адитянатх, энг экстремал исломофобик баёнотлар тажрибасига бой.
2014 йил август ойида YouTube-да пайдо бўлган санаси номаълум видеода Адитянатх динлараро никоҳлар натижасида бошқа динга ўтиш ҳақида гапириб: «агар улар битта ҳинд қизни олишса, биз 100 мусулмон қизни оламиз». Худди шу видеода у: «улар бир ҳиндни ўлдириш бўлса, биз 100 кишини ўлдирамиз» деб давом эттиради ва оломон «ўлдирамиз!» деб қичқирганида тўхтади.
2015 йил февраль ойида Адитянатх: «агар бизга имконият берилса, биз ҳар бир масжидга маъбуда Гаури, Ганеш ва Нанди ҳайкалларини ўрнатамиз» деди.
2020 йилда мусулмон аёлларнинг тинч норозиликлари пайтида у шундай деди: «агар улар сўзларни тушунмасалар , ўқларни тушунишади».
